Mañá martes está previsto que comece a vacinacion contra o Covid-19 de usuarios de idades comprendidas entre 60 a 65 años e posteriormente de 75 a 79 anos na Área Sanitaria de Ourense, Verín e O Barco de Valdeorras. No caso da cidade de Ourense farase no recinto de Expourense, mentres que no distrito sanitaro do Barco será no Hospita Público de Valdeorras e no Verín, no hospital verinés.
Así para a tarde do martes prevese a administración de 2.385 doses de AstraZeneca a usuarios de 60 a 65 anos. Delas, 1.725 serán inoculadas en Expourense, 330 no Hospital de Valdeorras, e 330 no de Verín, tal e como informa a Consellería de Sanidade.
Para o mércores está programado que se vacinen 4.365 persoas de 60 a 65 anos, tamén coa vacina de AstraZeneca: 3.540 en Expourense, 495 no Hospital de Valdeorras e 330 (mañá) no de Verín.
Ademais, de xoves a domingo, administraranse 12.600 doses de Pfizer a usuarios 75 a 79 anos: 10.100 en Expourense, 1.200 en Valdeorras (agás o domingo) e 1.300 en Verín (agás o domingo).
Así, está previsto que de martes a domingo se poñan 19.350 doses de vacinas contra o Covid na Área Sanitaria de Ourense, Verín e O Barco: 15.365 en Expourense, 2.025 en Valdeorras e 1.960 en Verín.
Ademais, dende Sanidade indican que se modifica o criterio de chamada ás persoas para a vacinación por grupos de idade, que agora “será de maior a menor”, é dicir, comezarase pola persoa de máis idade do grupo, polo que xa non se seguirá o sorteo de letras.