Aínda queda un mes pero tras dous anos de parón pola pandemia, son moitas as ganas de recuperar as actividades lúdicas polo que en Petín están ultimando a organización da IX edición da Feira de 1812, organizada pola Asociación Fonte Grande que se celebrará na fin de semana do 4 e 5 de xuño.
Tal como adianta a alcaldesa, Raquel Bautista, seguirá o mesmo esquema de anos anteriores pero tamén con algunha novidade. A principal será a ubicación, pasando das empedradas rúas do casco vello ata a praza e as rúas de arredor, onde se instalarán as adegas, postos e exposicións que participen este ano.
Coma sempre a feira abrirá de mañá e tarde sendo inaugurada o sábado día 4 ás 13 horas co pregón que nesta ocasión correrá por conta da escritora valdeorresa Mencía Yano (Ofir Enríquez Noia). Ese mesmo día pola noite celebrarase a II Cea Popular de Petín, a partir das 22:30 horas na rúa da igrexa, e regresará unha vella coñecida: a Sonora Petinesa, a banda de música local retirada hai uns anos, que actuará na praza Doutor Quiroga a partir das 00:30 horas.
No caso da tarde do domingo 5 de xuño a música correrá por conta da Real Banda de Gaitas da Deputación (19 horas) que porá o toque tradicional á esta festa que conmemora a Constitución de Cádiz de 1812.
Máis información na edición en papel do Periódico O SIL.