En portadaÚltima hora

A Veiga, Parada de Sil e Cervo, municipios galardoados nos Premios á Dinamización Demográfica

Panorámica da Veiga./ Foto: Carlos G. Hervella.

 

Xa se coñece o nome dos municipios premiados na primeira edicón nos Premios á Dinamización Demográfica. A directora xeral de Administración Local, Marta Fernández-Tapias, facía públicos neste 13 de decembro os concellos distinguidos nestes galardóns, aos que a Xunta destinou 77.500 euros. Son, por esta orde, os concellos da Veiga, Parada de Sil e Cervo, “polas súas medidas para xestionar o declive demográfico mediante o impulso e a revitalización da poboación no seu territorio”.

Así, o primeiro premio deste ano, dotado con 40.000 euros, recaeu no municipio da Veiga, pola “posta en marcha de políticas transversais coas que reforzar o papel dos emprendedores e dinamizar a economía local, como o proxecto para poñer en marcha un viveiro empresarial a disposición dos veciños interesados en emprender no sector agrario”, segundo informa a Xunta.

Tamén se destaca dende a administración galega que a “proposta da Veiga incide en eidos como o emprego, poñendo en valor produtos da zona como o mel, as fabas e os cogomelos das Montañas de Trevinca ou o fomento da plantación de novos soutos. Ademais, a rehabilitación de vivendas baleiras en desuso e de antigas casas-escola para alugueiro permitiu o traslado de varias familias ao municipio. Para potenciar o turismo da Veiga, o concello creou en 2017 o Centro de Visitantes ZEC Pena Trevinca e conta desde 2015 coa certificación como destino turístico Starlight pola excelente calidade do ceo. No ámbito de benestar social, habilitáronse axudas á natalidade e ao transporte, así como programas de conciliación e actividades de envellecemento activo”.

Parada de Sil

O segundo galardón desta edición, cunha contía de 25.000 euros, foi parar ao municipio de Parada de Sil. A iniciativa presentada por este concello busca o “asentamento de novas familias e xente nova a través da rehabilitación dun grupo de casas en ruínas no núcleo de Fondevila para emprazar cinco vivendas unifamiliares. Para fomentar a conciliación laboral e familiar, o Concello propón a reforma dunha antiga construción para albergar un espazo de coidado e casa de lecer para nenos menores de 10 anos en períodos vacacionais e tamén na época escolar para os nenos en idade previa á escolarización obrigatoria”, indica a Xunta.

 

Aparcadoiro de Parada de Sil, que aposta polo turismo, cheo de coches nunha fin de semana./ Foto cedida.

 

Por último, o concello lucense de Cervo foi recoñecido co terceiro premio, para o que se fixou un importe de 12.500 euros.  Coa primeira edición destes premios, a Xunta busca visibilizar e recoñecer as boas prácticas das entidades locais de menos de 20.000 habitantes para afrontar o reto demográfico que poidan aplicarse noutros municipios da nosa comunidade.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close