Primeiro foi en Mondoñedo coa posta en valor do Camiño do Norte; despois pasaron por San Cristovo de Cea coa Vía da Prata; Palas de Rei co Camiño Francés; Tuy co Camiño Portugués; e por último A Rúa coa promoción do Camiño de Inverno.
Na xornada deste sábado 13 de marzo, poñíase o broche ás xornadas multidisciplinares “Coñece os Camiños” coas que a Orde do Camiño de Santigao se suma ao programa O Teu Xacobeo, impulsado pola Xunta con motivo da celebración do Ano Santo 2021. Un acto celebrado o Centro Cultural Avenida co obxectivo de “contribuír a difundir entre os veciños de Valdeorras a cultura Xacobea”.
Coa presenza dun bo número de membros da Orde do Camiño de Santiago, encabezados polo seu presidente Miguel Pampín e o vicepresidente executivo Alejandro Rubín, a xornada arrancaba pasadas as once e media desta mañá, coa imposición do pano e do pin da Orde ao alcalde da Rúa, Álvaro Fernández. Como anfitrión do acto promocional da ruta xacobea que atravesa a comarca de Valdeorras (e vive este ano o seu primeiro Xacobeo como ruta oficial), o rexedor rues foi un dos encargados de inaugurar o acto, agradecendo a presenza dos asistentes e a iniciativa que “servirá para promocionar non só o noso pobo senón toda a comarca”, lembrando o labor dos concelleiros, especialmente de José Vicente Solarat que fixo de conexión entre o Concello e a organización.
Coa música dos gaiteiros solistas da Real Banda de Gaitas, Marco e Lucía, e presentado polo propio Rubín, o programa arrancaba trala inauguración coa primeira das conferencias, a cargo de Jesús Ares Vázquez, Presidente de ATREGA (Asociación de Turoperadores de Galicia) quen fixo un repaso histórico polas etapas e evolución do Camiño de Santiago como ruta cultural europea, dende o descubrimento da tumba do Apóstolo ata a actualidade, sen esquecer os períodos escuros (peste negra, guerra dos cen anos,…) e tamén os de máximo esplendor como o de 1993 “que supuxo un punto de inflexión ata o presente”, dixo.
A seguinte ponencia corría a cargo de Bruno de Llano, especialista en xestión local e autonómica de Ecoembes, que falou sobre a importancia do impacto medioambiental no Camiño poñendo de manifesto a relevancia de apostar pola sostibilidade.
Na terceira quenda subía ao escenario do Centro Cultural Avenida a presidenta da Asociación Camiños a Santiago pola Ribeira Sacra, Aida Menéndez, gran coñececedora do Camiño de Inverno que fixo unha interesante exposición sobre as singularidades desta ruta, partindo dos ríos como eixo central. Baixo o título “Un percorrido xacobeo entre ríos, viñedos, vestixios romanos e a singular terra monástica da Ribeira Sacra”, Aida destacou “a presenza do río Sil co que o peregrino queda impactado cando entra en Galicia por Valdeorras ata pasar Quiroga ao londo de 70 km”, sen esquecer ao río Miño en Belesar. “Nesta ruta os peregrinos perciben e desfrutan dos dous ríos máis importantes que vertebran a nosa terra galega, ademais de pequenos regatos nos que queda a impronta dos nosos antergos nas infraestruturas que utlizaban para cruzalos”. Ménedez non esqueceu a forte pegada romana, vencellada de novo ao río Sil que levaba o ouro, coa importante construción da Via Nova “esa calzada trasversal dende as Médulas, seguindo o curso fluvial”; nin os mosteiros, especialmente na Ribeira Sacra “lugares de hospitalidade onde os peregrinos atopaban acollemento”; e por suposto os viñedos. “O de inverno é o único camiño que percorre tres Denominacións de Orixe en Galicia: a de Valdeorras, Ribeira Sacra e Rías Baixas e a o Bierzo en León. É impresionante a riqueza que aporta”, asegurou.
O turno de intervencións pechábao a presidenta da Asociación de Amigos do Camiño de Santiago por Valdeorras Asunción Arias, falando do Camiño de Inverno “como eixo vertebrador da natureza e o ser humano”. Mais a xornada continuaba pola tarde, despois da degustación de produtos tradicionais da zona, coa posta en valor de aspectos etnográficos da vila, cunha visita guiada a Fontei (praza e igrexa guiados por Enrique Rodríguez Sotelo) e tamén á Ponte da Cigarrosa.
Fotos: Carlos G. Hevella/ Mónica G. Bellver.
Máis información no seguinte enlace: https://osil.info/en-marcha-o-acto-sobre-o-camino-de-inverno-na-rua/
