Durante unha reunión que se celebraba nesta mañá de 28 de novembro no Hospital Comarcal Valdeorras coa Xerencia da EOXI de Ourense, Verín e O Barco, a xunta de persoal deste centro sanitario decidía levantarse da mesa e deixar a xuntanza en protesta “pola situación do hospital e de primaria e en solidariedade cos compañeiros de Verín”.
Despois saían ao exterior do HCV e lían un comunido destinado á xerencia ourensá no que manifestaban o seu “total desacordo coa xestión levada a cabo pola dirección desta área sanitaria, que está levando nos casos dos distritos de Verín e do Barco ao seu deterioro e, de seguir por este camiño, á desaparición dos hospitais de referencia de ambos ditritos”.
Dende esta xunta de persoal considérase “especialmente grave” a “supresión do servizo de paritorio e das urxencias pediátricas no Hospitald e Verín, cando ten pensado facer o propio con servizos do HCV?”.
E insisten na “total falta de actuación ante a empresa do servizo de seguridade por impagamento por parte de ésta do salario correspondente aos traballadores de seguridade”. No texto do manifesto amósanse tamén contrarios ao “desmantelamento da Atención Primaria” e apoian “a convocatoria de folga dos médicos de familia e pediatras de Atención Primaria”.
Ademais a Xunta de Persoal anuncia que iniciará “as medidas que consideremos oportunas en defensa dunha sanidade pública digna e de calidade”.
Foto cedida.