Son xa multitude os municipios da provincia de Ourense e doutras partes de Galicia que teñen a mirada posta no vindeiro Entroido. Logo de que a pandemia obrigase a cancelar esta celebración ancestral o pasado ano, a situación podería ser diferente desta volta.
Así, o presidente da Xunta de Galicia, Alberto Núñez Feijóo, anunciaba onte en Ourense que o goberno galego traballa na elaboración dun protocolo de cara ao Entroido. “Eu espero que estea feito para primeiros de febreiro. Quedaríanos aínda todo o mes de febreiro para valorar e actualizar ese protocolo, pero, por se acaso, estamos traballando nel”.
Feijóo tamén matizaba que este protocolo “será, obviamente, orientativo e cinguirase e axustarase definitivamente á situación do Entroido dende o punto de vista da pandemia. Pero por se acaso, e dada a importancia e relevancia económica que ten o Entroido para algunhas zonas, imos facer ese protocolo con cautela e anticipación”.