Ata as 13 horas do vindeiro día 29 de decembro os nenos ou adultos que queiran tomar parte na comitiva dos Reis Magos (que percorrerá O Barco o 5 de xaneiro a partir das cinco da tarde) poderán realizar a súa inscrición. Para iso deberán cubrir un formulario presencialmente na Biblioteca Municipal Florencio Delgado Gurriarán (rúa Academia Dequidt, 6 baixo, da vila) de luns a venres de 11 a 13 horas e de 16 a 20 horas, os sábados de 11 a 13 horas.
Segundo se informa dende a Concellería de Cultura, a inscrición farase nun dos seguintes grupos:
GRUPO A.- Admitiranse 30 nenos (10 por cada unha das tres carrozas) de idades comprendidas entre os 5 e os 10 anos.
GRUPO B.- Estará formado por 36 nenos e xoves entre 11 e 17 anos ou persoas adultas, doce por cada unha das tres carrozas.
“En todos os casos será respectada a orde de inscrición e os menores deberán ser autorizados por escrito polos seus pais ou titores”, explícase dende a concellería.
Os inscritos no grupo B deberán presentarse no Teatro Lauro Olmo o día 5 de xaneiro ás 16 horas e terán que levar zapatos escuros, nunca deportivos.
Os inscritos no grupo A estarán na Estación de Autobuses o día 5 de xaneiro ás 17 horas, onde se lles entregarán uns petos que deberán devolver ao finalizar a cabalgata. Tamén deberán ir vestidos de escuro, negro ou azul mariño preferiblemente.
