Xogos predeportivos, rutas de sendeirismo, obradoiros, cine, actividades de ocio e tempo libre, actividades acuáticas,… Son algunhas das propostas do programa deportivo “Escola de Verán 2018” en Verín, unha iniciativa lúdico-deportiva, que se desenvolverá desde o luns 2 de xullo ata o xoves 31 de agosto, destinada a un máximo de 180 menores, nados dende o 2004 ata o 2014, cuxo prazo de inscrición está aberto dende hoxe.
As actividades que conforman devandito programa, que terá lugar de 10:30 a 13:30 horas, no Pavillón Municipal de Deportes e as piscinas de A Granxa, distribuiranse en grupos homoxéneos de idades (de 4 a 5 anos, de 6 a 7 anos, de 8 a 10 anos e de 11 a 14 anos), podendo elixir temporalidade (quincena, mes ou dous meses).
O grupo xeral de 3 días/semana dirixido a nenos de 4 a 14 anos, incluirá xogos predeportivos, rutas de sendeirismo, obradoiros, cine, actividades de ocio e tempo libre e actividades acuáticas; o grupo de fútbol e fútbol sala de 3 días/ semana dirixido a nenos de 7 a 14 anos, actividades deportivas de fútbol e fútbol-sala e acuáticas ao aire libre; e o grupo xeral de 5 días/ semana dirixido a nenos de 4 a 14 anos, inclúe xogos predeportivos, rutas de sendeirismo, obradoiros, cine, actividades de ocio e tempo libre e actividades acuáticas. Neste grupo existe a opción de acudir durante tres días ao grupo de fútbol e fútbol-sala e os dous restantes as actividades do grupo xeral de 5 días.
