Publicidade
CulturaCulturaEducaciónÚltima hora

Ábrese o prazo para a incorporación de centros ao Plan de Mellora de Bibliotecas Escolares

Segundo educación, "en igualdade de puntuación terán preferencia os colexios situados en concellos rurais"

Unha biblioteca escolar. /Foto: Mónica G. Bellver.

 

A Consellería de Educación, Universidade e Formación Profesional publica hoxe no Diario Oficial de Galicia a Orde pola que se convoca o Plan de mellora de bibliotecas escolares (PLAMBE) en centros públicos para o curso 2020/2021, coa que se abre tanto o prazo para a incorporación de novos centros a este programa como a solicitude de continuación por parte dos xa participantes.

Seleccionaranse un mínimo de 25 novos centros e “en igualdade de puntuación terán preferencia os situados en concellos rurais”, adiantan dende Educación. As asignacións para as novas incorporacións estarán destinadas á actualización dos fondos documentais da biblioteca escolar, á renovación do mobiliario e outro equipamento necesario, así como para outros gastos de funcionamento. No caso dos centros de continuidade, poderán destinar as asignacións a fondos, a mobiliario e outros equipamentos ou a gastos de funcionamento específicos da biblioteca, en función do ano no que se integraran no Plan.

Entre outras cuestións, a convocatoria establece que as adquisicións dos fondos se realizarán, preferentemente, a través das librerías da zona de referencia do centro, e que deberán incluír materiais destinados á atención da diversidade (libros e outros materiais destinados ao alumnado con dificultades específicas de aprendizaxe, necesidades educativas especiais, altas capacidades, alumnado inmigrante etc.). Así mesmo, a multiculturalidade e as diversas linguas con presenza no centro deberán ser convenientemente contempladas; e o 50% dos materiais adquiridos deberán ser en lingua galega.

O prazo límite de presentación de instancias é o 3 de xullo e deben presentarse obrigatoriamente por medios electrónicos a través do formulario normalizado dispoñible na sede electrónica da Xunta de Galicia.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close