No marco da Semana Santa a Concellería de Educación despregará un amplo programa de actividades formativas e de lecer para escolares da cidade. Presentábase na mañá do 8 de abril e desenvolverase en tres espazos diferentes: o Museo Municipal, a Aula de Natureza do río Miño e as bibliotecas municipais. Con elas preténdese, segundo sinalaba a edil ourensá de Educación, Ana Garrido, fomentar alternativas atractivas para nenos e nenas durante o seu tempo libre ao tempo que fomentar a conciliación laboral das familias ourensás durante estas datas de vacacións escolares.
Así o Museo Municipal acollerá un obradoiro sobre o mundo da arte co fin de aproximar aos nenos á comprensión da arte, da cor e das diferentes formas de expresión artística, entre outras cuestións; mentres que nas bibliotecas municipais (A Ponte, A Carballeira, San Francisco e punto de animación á lectura do Couto) haberá actividades vencelladas coa lectura, e na Aula da Natureza do río Miño, en Oira, organizaranse divertidas actividades baseadas na natureza e o medio ambiente.