Coa recepción de comensais ás 12:30 horas deste sábado 15 de febreiro e cos aperitivos comezaba a exitosa VII Festa do Botelo do Barco na Coruña, promovida polo Concello barquense. Desenvolvíase novamente no restaurante Árbore da Veira, no Monte de San Pedro, e resultaba “un éxito total”, en palabras do seu coordinador, José Ángel Rodríguez.
Así esta cita promocional do embutido barquense congregaba a 280 persoas, é dicir, o aforo completo do evento. Ademais houbo xente que se quedou sen entrada para o xantar, ao esgotarse as mesmas. Entre os presentes estaban o alcalde do Barco, Alfredo García, e a concelleira de Cultura, Margarida Pizcueta.
Os asistentes desfrutaban dun xantar cuxo menú era, en primeiro lugar, sopa de cocido e a xa tradicional empanada de maravallas. E, como non podía ser doutro xeito, o prato principal era o botelo, acompañado de cachelos, chourizos e verdura. Todo isto regado cos viños de godello da Adega D´Berna e o tinto mencía de Adega Roandi. Na sobremesa servíase bica e os licores da Adega Godeval.
Tampouco faltaba a música e ademais con sorpresa incluída. Á metade do xantar, aparecían, como se fosen camareiros, os membros do grupo Galiartist (unha soprano, un tenor e un pianista), que interpretaban un total de cinco arias de ópera. A última das pezas era da Traviata, nos brindes. “Esta é a banda sonora que sempre se usa nos vídeos sobre a Festa do Botelo do Barco na Coruña e con esa aria a xente levantouse coa copa e fixemos un brinde”, destaca José Ángel Rodríguez, de quen xurdía a idea.
Finalmente, tras o xantar, non faltaba o baile ata ben entrada a tarde contanco coa actuación, un ano máis de Os Peteras.
Fotos cedidas.