Aida González, candidata socialista á alcaldía de Montederramo

Defende “mellorar as infraestruturas, os servizos públicos e a asistencia aos nosos maiores”, ademais de “promover a actividade económica”, tal e como adiantaba no seu acto de presentación ante a veciñanza neste 13 de abril

Aida González (terceira pola esquerda) no acto de presentación como candidata socialista á alcaldía de Montederramo.

O claustro do Mosteiro de Santa María de Montederramo acollía na tarde do 13 de abril o acto de presentación da candidata socialista á alcaldía deste concello, Aida González. Segundo ela mesma explicaba, pretende “darlle un cambio a Montederramo, cunha aposta polo rural, polas oportunidades para os máis novos e polos servizos para os nosos maiores. Queremos loitar contra a despoboación que sufre o municipio e para logralo a mellor maneira é promover a actividade económica que garanta oportunidades laborais para que a xente deste concello non teña que marchar a traballar fóra”, explicaba a cabeza de lista.

González tamén incidía en que “máis da metade da poboación de Montederramo son maiores de 65 anos, polo tanto, temos que coidar deles e para iso intentaremos crear un servizo de comedor sobre rodas e tamén mellorar os servizos de axuda no fogar”. Referíase asemade á necesidade de “mellorar as infraestruturas por estrada”, así como á de estar en contacto cos gandeiros “porque Montederramo é un dos concellos onde máis explotacións hai e queremos saber que inquedanzas teñen e que podemos facer para axudarlles”.

Dende a candidatura socialista, concluía Aida González, “ofrecemos unha xestión sinceira, honesta, queremos traballar para os veciños de Montederramo e de todos os seus pobos. Reduciremos os gastos non esenciais para poder dedicar eses recursos aos que nós consideramos máis importantes, que son promover a actividade económica, mellorar os servizos públicos e asistencia aos maiores, pero para todo iso necesito de vos”.

Neste acto, ante máis de medio cento de persoas, a Aida González estivo acompañada polo secretario de organización socialista e candidato ao Senado, Juan Carlos Francisco; pola candidata ao Congreso por Ourense, Marina Ortega, e pola deputada galega, Noela Blanco.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies