En portadaÚltima hora

Alcaldes transfronteirizos, Xunta e Deputación apoian unha conexión internacional coa estación do AVE da Gudiña

O goberno galego comprometíase nun encontro na Gudiña a trasladar esta reivindicación ao Ministerio de Fomento e á Comisión Hispano-Lusa para a Cooperación Transfronteiriza

Unha conexión por autovía entre Macedo de Cavaleiros (Portugal), subindo pola zona de Vinhais e entrando en España para enlazar dende a A-52 coa estación do AVE da Gudiña. É a petición que facían de forma conxunta alcaldes do sueste da provincia de Ourense (A Gudiña, Viana do Bolo, Vilariño de Conso, A Mezquita, Monterrei, Oímbra, Riós…), da zona de Tras-os-Monte (agás o de Bragança), a Xunta de Galicia (representada polo seu vicepresidente e pola conselleira de Infraestruturas) e a Deputación de Ourense nun acto institucional que tiña lugar no mediodía deste 14 de outubro na Casa da Viúva na Gudiña.

“Entendemos que A Gudiña ten que ser a porta efectiva de Galicia, estamos falando de vertebrar unha rexión que vai dende a zona do Barco e Ponferrada, ata parte norte de Portugal, e que comprende unhas 400.000-500.000 persoas que van ter na Gudiña a súa estación de entrada á alta velocidade. Iso vai facer que tamén se vertebre o territorio e que se atraian investimentos tanto industriais como loxísticos para esta zona”, aseguraba o alcalde da Gudiña, José María Lago.

“Esta é unha conexión fundamental para a rexión norte de Portugal co AVE e coa A-52 e tamén para o resto de Galicia. Hai moitas razóns para conseguir que esta conexión sexa no futuro unha realidade. Para Vinhais esta conexión vai ser estratéxica e entre todos temos que facer que sexa posible”, sinalaba o presidente da Cámara de Vinhais, Luís dos Santos Fernandes.

De maneira moi semellante se manifestaba o presidente da Cámara Municipal de Miranda do Douro, Artur Nunes, quen subliñaba a importancia desta xuntanza para reivindicar esta conexión internacional. “Xa non hai fronteiras, o contexto fronteirizo xa non existe, o que si existe é a necesidade efectiva de conectar dous países e falamos ademais da fronteira máis antiga de Europa. Esta conexión pode ter un valor engadido para Portugal e España. Nós estamos preocupados polo despoboamente e polas conexións transfronteirizas, por iso queremos reivindicar esta conexión, que é prioritaria para nós, para desenvolver Tras-os-Montes e Galicia”.

 

 

Á Xunta de Galicia súmase a “esta alianza”, tal e como dicía a conselleira de Infraestruturas, Ethel Vázquez, destacando a rendabilidade e proveito “desta conexión internacional que debería facerse entre 2020 e 2030, con 50 km en Portugal e 7 km en Galicia. É unha reivindicación que faremos ante o Ministerio de Fomento porque é unha necesidade para ambos territorios e que fará que A Gudiña sexa a verdadeira porta de entrada a Galicia”.

“Este é un proxecto que cremos que ten que saír adiante. Todas as grandes infraestruturas empezaron por unha decisión política. Estamos no comezo do camiño”, engadía o vicepresidente da Xunta de Galicia, Alfonso Rueda. Neste encontro de traballo tamén se acordou que o goberno galego dará traslado desta demanda á Comisión Hispano-Lusa para a Cooperación Transfronteiriza.

Ademais, tanto Ethel Vázquez como Alfonso Rueda, reiteraban que o Ministerio de Fomento debe cumprir os prazos para que a conexión do AVE a Madrid “estea en probas antes de finais deste ano e funcionando con todas as garantías de seguridade no 2020”.

No acto tamén se contaba coa asistencia do vicepresidente da Deputación, Rosendo Fernández, quen resaltaba o valor de “aproveitar a sinerxía da chegada da alta velocidade para comunicarnos mellor cos nosos irmáns portugueses. Temos que aproveitar esta oportunidade”.

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close