Alfredo García: “Queremos seguir traballando polo futuro do Barco”

O candidato socialista á alcaldía do Barco e actual rexedor apostaba por unha “segunda transformación da vila” a partir da estrada de circunvalación nun mitin no que estivo acompañado por Margarida Pizcueta, Lalo Santos e Luis Arias

Á beira do río Sil, no Malecón, era o lugar escollido polo PSdeG-PSOE do Barco no último día de campaña para o celebrar o seu mitin, na tarde do 24 de maio. O acto encetábase coas intervención de Margarida Pizcueta, número 2 da lista, e Lalo Santos, número 11. Pizcueta comezaba sinalando que a candidatura socialista, liderada por Alfredo García, é “a máis forte e a que ten máis experiencia”.

Tamén aseguraba que o programa co que se presentan é “realista e riguroso, está feito cos pés na terra” e que o seu lema de campaña expresa “as nosas intencións: seguir traballando cun proxecto realista, con ideas, con ilusión para conseguir O Barco que todos queremos máis humano, limpo, sostible e con máis participación cidadá”. Nese senso, Santos engadía que “queremos contar coa participación dos veciños, tanto a nivel individual como colectivo a través das asociacións, que son moi importante para nós” e amosaba o compromiso dos socialistas “co programa, co Barco e con Alfredo García”.

Margarida Pizcueta finalizaba esta intervención conxunta sinalando que “a mellor recompensa ao noso traballo será poder mellorar os resultados de hai 4 anos” e dáballe paso ao exconcelleiro Luis Arias, tamén integrante da lista do PSdeG nestas eleccións, quen destacaba que “os socialistas non vimos a medrar, senón a traballar, nós gobernamos para todos”. Criticaba a forma de distribución dos fondos aos concellos da Deputación  e pedía “un reparto equitativo, que nos dean o que nos corresponde. O noso problema está en Ourense, levamos 20 anos de marxinación”.

Arias facía un repaso polos vinte anos de xestión de Alfredo García como alcalde do Barco, resaltando feitos como o “PXOM, unha obra importantísima realizada entre 1999 e 2002, que abriu a vila de esquina a esquina. O Barco non tiña timón nin vela ata que o colleu Alfredo e empezou a andar”. E pedía que o vindeiro domingo 26 de maio “cando abramos as urnas estean cheas de rosas que cheguen ata o teito para que o proxecto que comezamos non morra”.

 

 

Finalmente, tomaba a palabra o candidato socialista á alcaldía barquense, Alfredo García, quen amosaba a vontade do seu equipo de “seguir traballando polo futuro do Barco. En 20 anos transformamos este pobo e queremos agora facer a segunda transformación que virá coa estrada de circunvalación coa que sacaremos do Barco os camións e iso vainos permitir aprobar un plan de mobilidade que xa está feito e que imos debatir con todos os veciños. A cidade ten que ser para as persoas, non para as máquinas, iso iniciámolo hai 20 anos, pero hai que rematalo”.

 

 

García apuntaba tamén que “queremos ampliar O Barco cara o outro lado, para iso convocaremos un concurso de ideas para ver como podemos embelecer O Salgueiral. Queremos que o río Sil non sexa o límite do Barco, senón o seu centro”. O seu proxecto inclúe outras iniciativas como a potenciación do servizo de limpeza viaria, “coa incorporación de novos traballadores e ampliación do parque de maquinaria”, a recuperación do patrimonio, a creación dun museo da lousa e dunha escola de danza, a mellora das instalacións deportivas e a construción dunha segunda pista polideportiva, a ampliación do polígono industrial, e a mellora das infraestruturas no medio rural “facendo un proxecto integral para cada un dos núcleos”, entre outras.

O candidato socialista finalizaba a súa intervención falando da situación da sanidade e resaltando que hoxe “o Hospital Comarcal Valdeorras presta uns servizos moito máis deficientes dos que prestaba e iso hai que revertelo”.

Fotos: A.R./ Carlos G. Hervella.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies