Non hai como unha clase práctica para aprender un concepto. Por iso, no marco da clase de Ciencias Sociais do colexio Pablo VI-Fátima, que imparte Rocío Illesca, os alumnos de 3º e 4º de Primaria participaron activamente nun pleno infantil celebrado na mañá do 23 de maio no salón plenario do Concello da Rúa. Os primeiros como público (eles serán os protagonistas o ano que vén) e os segundos como se da corporación municipal se tratara.
Tal como explica a profesora, o tema sobre o goberno municipal foi tratado na clase de 4º. “Os alumnos dividíronse en tres grupos (partidos políticos): Together we can, Junior Team e Pichichis, cada un presentou e expuxo o seu programa, houbo eleccións e finalmente saíu elexido o de Together we can”, di Rocío, engadindo que a idea é que ademais de estudalo sobre o papel, os cativos puderan vivir a experiencia en persoa.
Así, unha vez conformada a corporación e coa alcaldesa electa Celtia Alonso dirixindo a sesión, os concelleiros foron expoñendo ao pleno as súas propostas, rebatidas pola oposición e votadas. Ideas como a creación dun campo de fútbol na Rúa Vella con porterías novas e céspede artificial; un parque pensado para os máis pequenos; ou un parque acuático, tocáronse durante a sesión, baixo a atenta mirada do público, da titora de 3º Cristina García, do director do colexio José Manuel Carrasco, do alcalde da Rúa Luis Fernández e da profesora de Ciencias Sociais, Rocío Illesca, presentes na sala.
Fotos: Mónica G. Bellver.
