O colectivo Amigos da Terra está a levar traballos de rexeneración das zonas afectadas polos incendios forestais no monte comunal de Tourón, en Melón. En colaboración con Vergasta e máis dunha vintena de voluntarios, xuntáronse, o pasado 26 de novembro, nestas zonas afectadas polos lumes o pasado mes para realizar as primeiras actuacións de recuperación orientadas á retención do solo fronte a erosión que poida sufrir debido ás chuvias dos vindeiros meses.
As accións levadas a cabo consistiron en dispersar palla nas zonas que tras os lumes quedaron sen cobertura vexetal e a construción de barreiras a partir de restos vexetais en franxas perpendiculares á pendente nas zonas preto das correntes de auga. O traballo levado a cabo durante a xornada estendeu a as accións ao longo dunha superficie aproximada de sete hectáreas.
Con estas actuacións, ademais da recuperación de zonas forestais arrasadas polos lumes, din dende amigos da Terra, búscase a sensibilización e mobilización social que impulse os cambios nas políticas forestais necesarios para evitar que no futuro o risco de incendios forestais.
O próximo domingo, continuarán coas actuacións de recuperación nesta zona ata chegar a cubrir toda á superficie arrasada polo lume na zona de monte comunal, dunhas 11 hectáreas, con estas medidas de “primeiros auxilios” de protección e mantemento do solo, que máis adiante poderían complementarse con accións para axudar na rexeneración da cobertura vexetal, reiteran. Ao mesmo tempo, ao longo dos próximos meses, din que contemplan levar a cabo actuacións semellantes noutras zonas afectadas polos incendios.
