O xurado do certame da XXXVIII Feira do Viño de Amandi (Sober) vén de facer público o seu fallo. Por unanimidade elixía como traballo gañador desta edición do concurso o presentado por Ana Santiso Vilar, veciña de Sistindomato, na parroquia soberina de Canabal.
O xurado destacou o alto nivel dos 28 orixinais presentados, chegados de diferentes puntos do Estado. En concreto, recibíronse carteis de Cataluña, País Vasco, Madrid, Valencia, Asturias, Andalucía, Castela León e Castela a Mancha, Estremadura, A Rioxa e Galicia; de onde proceden a maioría dos participantes.
O xurado estivo formado por Humberto Loureiro Argullos, Fernando Vázquez González e Alejandro José Ciurluini. Tamén acordou conceder un accésit como finalistas aos carteis de Edith Nieves Sánchez, da Estación (A Pobra de Brollón), e de Clara Romero Aguado, de Barcelona.
A ganadora recibirá un premio en metálico de 600 euros. Os accésit contarán con 100 euros e cun diploma e cun lugar destacado na exposición que se faga con todos os traballos presentados.
O cartel ganador farase público o sábado día 24 de febreiro no miradoiro de Cadeiras. Celebrarase un acto ao que se asistirán os adegueiros e no que se darán a coñecer os actos que formarán parte do ‘Mes do Amandi’ e a programación da XXXVIII Feira do Viño de Amandi que este ano se celebra os días 24 e 25 de marzo.
