Os cociñeiros dun total de trece establecementos hostaleiros de Ourense, A Pobra de Trives, Verín, Celanova, Ribadavia e Pereiro de Aguiar forman parte da asociación “Cociña Ourense”, un colectivo que comeza hoxe a súa andadura para “defender o compromiso coa terra, os produtos autóctonos e as excelencias eno-gastronómicas da provincia de Ourense”.
A presentación esta nova asociación tiña lugar na mañá do 14 de xaneiro nun acto que contou coa presenza do presidente da Deputación Manuel Baltar e dos membros do colectivo, entre eles Miguel González e Marco Varela, presidente e vicepresidente da entidade, e Anxo Trives, cociñeiro do Restaurante La Viuda.
O presidente do goberno provincial agradeceu “a idea e a iniciativa desta asociación para que Ourense estea presente nas grandes citas gastronómicas e contemos para elo con embaixadores de primeiro nivel como son os grandes restauradores que temos na provincia de Ourense”.
Miguel González explicou que as iniciativas que levará a cabo “Cociña Ourense” xiran ao redor de promover a cociña e os produtos da horta ourensá e estar presentes en próximos eventos como Fitur, Xantar e no encontro gastronómico internacional Enbiga. “Entre as innovacións que imos desenvolver figuran traballar co Campus de Ourense e outras universidades para investigar no estudo das augas das Burgas para a súa utilización na alimentación; e no ámbito da cooperación, asinar convenios con entidades vinculadas á formación gastronómica, como a Escola de Hostalaría de Vilamarín”, destacou o presidente de “Cociña Ourense”, avanzando que o evento de presentación da asociación terá lugar en marzo ou abril próximo, e entre os retos futuros figura que Ourense acolla en 2020 o Congreso de Gastronomía, coa presenza de destacadas figuras do ámbito gastronómico.
