Tradicionalmente a Bica de Trives sempre se comeu con leite no almorzo ou con licor de café como postre. Pero o certo é que este exquisito doce manteigado das Terras de Trives pode degustarse de mil e unha forma. Así o demostraba Anxo Trives, chef do Restaurante La Viúda e membro da Asociación Cociña Ourense, no obradoiro que ofrecía na tarde do 6 de febreiro, no marco da 20 edición de Xantar que se está celebrando en Expourense.
Acompañado por Sayoa Caneda, da Panadería Caneda, que elaborou unha bica en directo, Anxo preparou en poucos minutos tres formas de presentar e degustar o doce: Bica de Chocolate, Bica de Café “a que máis me gusta”, dixo, e Tarta de Bica con Castaña “na que aproveitamos outro dos produtos da nosa terra”.
Durante a demostración, a primeira da Asociación Cociña Ourense en Xantar, o cociñeiro trivés asegurou que “as combinacións son infinitas”, mentres os asistentes daban conta dos postres alí elaborados. Sayoa pola súa banda lembrou que “o importante é a materia prima e comer a bica dous días depois de facela xa que é cando a manteiga colle o seu punto de sabor característico”.
Fotos: Carlos G. Hervella.