Constitúe todo un referente no sector vitivinícola. Pero vai máis alá. Cunha longa andaina de 32 edicións, a Feira do Viño de Quiroga, que se celebra na Semana Santa, tense convertido nun reclamo turístico, gastronómico e cultural, segundo destaca o rexidor quirogués, Julio Álvarez.
Cada ano vén incorporando novas propostas que reforzan o seu programa, que nesta edición terá como limiar (o 5 de abril) unha cata dos caldos participantes no certame. Será ás 13 h. no Museo Etnográfico e correrá a cargo dos membros da Confraría do Viño de Quiroga. De seguido, do 10 ao 18 de abril terá lugar o III Concurso “Quiroga de Tapas”, mentres que o 13 de abril ás 18h. abrirase a mostra de pintura de Suso Talento na Casa da Cultura (que poderá visitarse ata o día 20) e unha hora despois María do Ceo dará un concerto (venta de entradas na Casa da Cultura) no Auditorio Municipal. Xa o 17 de abril ás 19h. presentarase a guía do Camiño de Inverno a Santiago de Aida Méndez na Casa da Cultura.
Entre as propostas tampouco faltará o deporte e así, do 14 ao 17 de abril, terá lugar o III Trofeo Fútbol Sala da Feira do Viño e o 18 de abril celebrarase a X Carreira popular da mostra ás 17h.
A Feira do Viño de Quiroga propiamente dita celebrarase os días 19 e 20 de abril e nela poderán degustarse os viños de once colleiteiros. O acto inaugural da mostra está previsto para ás 18:15h. e contará coa presenza do director xeral de Desenvolvemento Rural, Antonio Crespo.
Texto: Ángeles Rodríguez Foto: Carlos G. Hervella
(Máis información na edición en papel do Periódico O Sil).