Coa tradicional demostración de malla, rodeaba por numeroso público, concluía o XIV Mercado Medieval que se celebraba na fin de semana do 8 e 9 de xullo en Tremiñá-Veigamuíños (O Barco). Os mallos cantaban por turnos e corría o viño e a cervexa para apagar a sede e descansar entre turno e turno. Entre tanto soaba a música tradicional do grupo valdeorrés Pándega.
Numerosas persoas percorrían esa mesma tarde as rúas desta localidade barquense, ateigada de postos de multitude de produtos, entre os que non faltaban doces de diverso tipo, licores e outro tipo de bebidas como a sangría. Ademais podían mercarse libros, prendas de vestir, bisutería, obxectos antigos…
Este mercado medieval ten sido organizado pola Asociación de Mulleres Rurais de Veigamuíños e con el esta zona barquense recreaba o seu pasado medieval.
Fotos: Carlos G. Hervella.
