DeportesÚltima hora

Aprázase a proba Gran Fondo Pena Trevinca

A organización deste evento cicloturista, previsto para o 15 de setembro, vén de anunciar que se cancela polas previsións meteorolóxicas adversas

 

Malia que todo estaba disposto, finalmente na mañá do vindeiro 15 de setembro non terá lugar en Casaio (Carballeda de Valdeorras) a saída do “Gran Fondo Pena Trevinca 2019”, cuxo trazado previsto percorría as comarcas de Valdeorras (Ourense) e La Cabrera (León). A organización desta proba cicloturista, en mans de MOVENTS Sport&Entertainment, vén de emitir un comunicando para anunciar que se cancela a carreira ante as previsións de meteoroloxía adversa para esa xornada.

“Tras varias horas de reunións e valoracións profundas e responsables, baseándonos na previsión meteorolóxica adversa e excepcional que nos facilita Meteogalicia e outras fontes consultadas e, en consenso coa Garda Civil de Tráfico, Motovueltas, Catering, Audiovisuales… vémonos obrigados a non poder celebrar o noso evento deportivo con todas as garantías. Para nós a seguridade do corredor é prioritaria á hora de tomar decisións e, nestes momentos, non podemos asegurar ao 100% que a proba vaia transcorrer con total normalidade”, segundo informa o director da carreira, David Álvarez.

O comunicado tamén matiza que “o espectacular do percorrido (camiños rurais e longos descensos de portos por estradas secundarias) faino á súa vez peculiar a extraordinariamente perigoso en condicións de meteoroloxía adversa”. A organización tivo moi en conta á hora de decidir suspender a proba “a posibilidade de tormenta eléctrica nos 3 portos, ademais da chuvia intensa a noite previa e a mañá da carreira fai que continuar cara diante neste momento sexa botar unha moeda ao aire cando a confirmación agora mesmo de precipitación é do 100%”.

Ademais a organización agradece “a predisposición do sarxento de Tráfico de Ourense e de todo o seu equipo, dispostos en todo momento a aceptar a nosa decisión en caso de non aprazar” e o “apoio e cercanía” do pobo de Casaio. “Dende este mesmo momento estamos traballando en consenso (organización, empresa de cronometraxe, audiovisuais, DXT, Protección Civil e resto de administracións competentes) para poder anunciar unha nova data canto antes”.

Asemade indícase que “ninguén se preocupe pola súa inscrición, unha vez anunciada a nova data, en caso de non pode acudir, a inscrición poderase ceder a outro participante que si poida acudir”.

Artigos relacionados

Back to top button