ConcellosSan Xoán de RíoÚltima hora

Aprobado inicialmente o Plan Básico Municipal de San Xoán de Río

Este é o terceiro concello galego en conseguir superar este trámite para dotarse deste novo instrumento de ordenación

 

Neste 3 de marzo vén de aprobarse inicialmente, por parte da Consellería de Medio Ambiente, Territorio e Vivenda, o Plan Básico Municipal (PBM) de San Xoán de Río. Deste xeito, Río convértese no terceiro concello galego, despois do Páramo e Triacastela, en conseguir superar este trámite para dotarse deste novo instrumento de ordenación, previsto na Lei do solo de 2016.

A directora xeral de Ordenación do Territorio e Urbanismo, Encarnación Rivas, visitaba hoxe San Xoán de Río e mantiña unha reunión co seu alcalde, Xosé Miguel Pérez Blecua, para notificarlle a sinatura da orde de aprobación inicial do PBM, unha ferramenta pensada para concellos de menos de 5.000 habitantes sen planeamento (un total de 37 municipios galegos) co fin de poidan desenvolver certa actividade urbanística pero sen establecer criterios de crecemento urbano.

O rexedor estaba tamén acompañado nesta reunión polo grupo de goberno ao completo, así como por Darío Álvarez, ex alcalde de San Xoán de Río (2003-2010), e polo ex tenente de alcalde Samuel Pérez (que ocupou o cargo antes de 2003 e entre 2011 e o 2015); ademais de por Juan Rodríguez e Magín Feijóo. Dende o grupo de goberno apostouse por buscar o consenso neste plan.

Para axudar e motivar a estes municipios a tramitar un Plan Básico, a Xunta decidiu asumir directamente a redacción do primeiro, o do Concello do Páramo, ademais de colaborar técnica e economicamente con outros oito concellos, que xa teñen nestes momentos moi avanzada a tramitación dos seus respectivos PBM (Ribeira de Piquín, Riotorto, Trabada, Cartelle, Padrenda, Porqueira, Triacastela e San Xoán de Río).

“Deste primeiro grupo de municipios, San Xoán de Río é o terceiro en conseguir a orde de aprobación inicial da Xunta e o primeiro que a acada na provincia de Ourense, dando así un paso importante de cara a dotarse do seu marco propio en materia urbanística”, tal e como se destaca dende a consellería.

Neste sentido, o PBM do Concello delimita un total de 49 núcleos rurais e recolle todas as dotacións existentes na actualidade así como aquelas categorías de solo rústico resultantes da aplicación das lexislacións sectoriais con incidencia sobre San Xoán de Río.

 

O alcalde de San Xoán de Río e a directora xeral de Ordenación do Territorio e Urbanismo.

 

O plan aprobado hoxe inicialmente tamén identifica e cataloga os elementos do patrimonio cultural e natural do concello e, a maiores, inclúe outros elementos que, polas súas singulares características ou valores arqueolóxicos ou arquitectónicos, son merecedores dunha consideración e protección especial. Concretamente, no documento se cataloga un elemento de tipo paisaxístico (o BIC correspondente coa paisaxe cultural da Ribeira Sacra), 10 elementos de tipo arqueolóxico e 14 de tipo arquitectónico.

Urbanismo sostible

“A tramitación dos primeiros Plans Básicos Municipais enmárcase no esforzo realizado na última década pola Xunta para acadar o obxectivo de que Galicia avance cara a un urbanismo sostible e responsable e na protección da súa paisaxe”, destaca a consellería.

Desde o ano 2009 aprobáronse instrumentos normativos e medidas para cumprir este reto, como as Directrices de Ordenación do Territorio, o Plan de Ordenación do Litoral, a Estratexia da Paisaxe Galega ou o Plan Básico Autonómico; e dotouse á comunidade dunha nova Lei do Solo e, máis recentemente, da Lei de Ordenación do Territorio.

Neste sentido, seguirase avanzando tamén na tramitación dos outros Plans Básicos Municipais que xa superaron o trámite ambiental, co obxectivo de que poidan ser aprobados inicialmente o antes posible, unha situación na que estarían Ribeira de Piquín, Riotorto e Trabada (provincia de Lugo) e Cartelle, Padrenda e Porqueira (Ourense).

Fotos cedidas.

De igual xeito, un segundo grupo de nove concellos con menos de 5.000 habitantes (Alfoz, Guntín, Samos, Beariz, Lobeira, Punxín, San Cristovo de Cea, Viana do Bolo e Dozón) están xa a impulsar os primeiros traballos que implica a redacción dun PBM, concretamente, a obtención da súa cartografía, polo que se espera que en 2021 reciban tamén un pulo definitivo.

Artigos relacionados

Back to top button