Na mañá deste xoves 8 de abril a xunta de goberno local do Concello de Ourense aprobaba as bases e a convocatoria do XII OUFF Escola, un certame de cinema organizado pola Concellaría de Educación en colaboración coa Secretaría Xeral de Política Lingüística.
Así, no concurso poderán participar centros educativos públicos e privados de ensino non universitario de Galicia durante o curso 2020-2021, así como aqueles de fóra de Galicia que teñan materias en lingua galega. Estabelécense dúas categorías: Infantil e Primaria; e outros niveis de ensino non universitario (agás as escolas oficiais de Imaxe e Son). Cada unha das categorías repartirá 1.500 euros en premios.
Os membros do xurado valorarán criterios coma a calidade da obra, orixinalidade do argumento, autenticidade e calidade no uso da lingua, potenciación de valores democráticos e de tolerancia ou o uso creativo das novas tecnoloxías e das ferramentas de software libre.
A entrega de galardóns realizarase no marco do 26º Festival de Cine Internacional de Ourense, no cal se poderán ver tamén os traballos gañadores.
