CulturaCulturaÚltima hora

Armea (Allariz), un castro que en realidade era unha cidade romana

Neste martes vén de iniciarse unha nova campaña de escavación neste xacemento, no que xa se leva traballando de forma continuada dende hai unha década

Publicidade
Xacemento de Armea (Allariz)./ Foto: Duvi.

 

Cando o equipo de Adolfo Fernández, docente e investigador da Universidade de Vigo, iniciaba no 2011 a súa primeira campaña na Armea (Allariz), pensaba que se trataba dun castro. “Comezamos da nada practicamente. Era un xacemento que quedara esquecido e aínda que se escavara na década de 1950, tapárase e non era visitable”, comenta o investigador.

O traballo realizado durante unha década neste xacemento, froito da colaboración iniciada entre o Grupo de Estudos de Arqueoloxía, Antigüidade e Territorio da UVigo (GEAAT) e o Concello de Allariz, permitiu tamén mudar o concepto que desde o ámbito investigador se tiña de Armea. “Coñecíase como un castro máis da arqueoloxía galega, un xacemento tipo da Idade de Ferro, e unha vez que nós levamos alí varios anos o que cremos, e así queda publicado, é que se trata dunha cidade romana. Polo tanto si que se cambiou o panorama, neste caso investigador do xacemento”, conta o director da escavación, Adolfo Fernández. Ademais o lugar hoxe constitúe unha referencia social e ten un impacto económico no municipio. Calcúlase que o visitan unhas 10.000 persoas ao ano, tal e como hoxe dá a coñecer a Universidade de Vigo a través do seu diario dixital.

Este martes vén de iniciarse unha nova campaña de escavación e posta en valor da zona, que se prolongará durante todo o mes de xullo e na que participarán 30 estudantes, seleccionados de entre os máis de 300 procedentes de universidades españolas e estranxeiras que solicitaron participar nesta campaña.

Prevese acondicionar a zona limpando a maleza, podando árbores na zona da nova escavación. “Nesta campaña espérase avanzar na zona leste do xacemento descubrindo unha nova casa da época romana (a domus do triscele), a continuidade dunha rúa e parte doutra gran casa coñecida como domus do hexascele”, en palabras de Adolfo Fernández, que matiza que aos traballos arqueolóxicos vanlle seguir os de conservación e restauración, que procurarán protexer e poñer en valor os vestixios atopados durante esta campaña.

 

Foto: Duvi.

 

Formación en arqueoloxía de campo e visitas guiadas

Durante as semanas que dure o traballo pasarán por Armea uns 30 estudantes, que se formarán en arqueoloxía de campo, ademais de persoal técnico da Facultade de Historia do campus de Ourense e operarios do Concello de Allariz. Ademais, durante a escavación as persoas interesadas poderán visitar o xacemento polas mañás

A publicación de artigos científicos e a asistencia a congresos nos que se divulgou o traballo realizado ao longo desta última década, permitiu que o xacemento de “ser un completo descoñecido a nivel nacional” xa se coñeza bastante, mentres que internacionalmente a Cidbá de Armea estase a converter nos últimos anos nun polo de atracción para estudantes europeos e de EEUU interesados en participar durante o verán nas escavacións. “A nivel internacional tamén vai tendo repercusión, non tanto cientificamente, xa que é un xacemento que non é a gran cidade clásica como as do Mediterráneo de Hispania, pero pouco a pouco se vai coñecendo, e a nivel galego está destacando como un xacemento moi importante de época romana”, asegura Adolfo Fernández.

 

Foto: Duvi.

 

Son, polo tanto, dez anos de traballo con momentos que o director das escavacións lembra de xeito especial como a aparición da primeira pedra labrada cunha roseta moi decorada, usada como adorno nas casas romanas de Armea. “Agora temos unha ducia, pero a primeira foi como moi apaixonante cando saíu, porque sabiamos que existían e que Conde-Valvís recuperara varias na década de 1950, pero nós non sacáramos nunca e a primeira vez que apareceu foi moi importante”, recorda Fernández.

Outro dos logros desta década a “invención”, en palabras deste investigador, dos convenios específicos de arqueoloxía entre a Facultade de Historia e o Concello de Allariz. “Isto marcou o marco xurídico de colaboración entre a nosa facultade e o concello e serviu de modelo a moitos outros. Creamos unha cousa nova que non existía, porque en Galicia non se coñecía nada similar para a colaboración entre universidade e concello”.

Artigos relacionados

Back to top button