O tradicional Xoves de Comadres dá hoxe o pistoletazo de saída á semana grande do Entroido na vila do Támega. A xornada comezaba co Desfile Infantil polas rúas do pobo no que participaron as Garderías Pinocho e a Asociación Tres Reinos de A Mezquita; os CEIPs Vilariño de Conso, Amaro Refojo, Princesa de España, Castrelo do Val, Rodolfo Núñez de Vilardevós, Vendas da Barreira, Augusto Assia da Mezquita e Medeiros; o Colexio Rural Agrupado Monterrei; o Colexio María Inmaculada e o IES García Barbón, co acompñamento musical das charangas Támega, Vakapinta, Mil9, Nova Terras de Trives, Europa e A Chicoria.
E pola noite, mandan as mulleres. Traslas habituais ceas nos restaurantes da vila, amenizadas polas charangas, as mulleres dirixiranse, ás 00:30 horas, á Casa de Escudo, onde a raiña do Entroido, Dna. Elena, recibirá á comitiva encabezada por Don Carnal. Xuntos descenderán polo camiño Real ata a Praza Maior para dar a benvida ás longas noites de festa no Entroido de Verín.
