A Consellería de Infraestruturas e Vivenda publica hoxe, 8 de xaneiro, no Diario Oficial de Galicia (DOG) o anuncio polo que se aproba o expediente de información pública e definitivamente o proxecto de construción de mellora da seguridade viaria na estrada OU-105, ao seu paso por Seixalbo, cun investimento de 900.000 euros.
“Este goberno municipal cumpre co prometido. Solicitamos á Xunta o arranxo desta vía, trasladando así unha histórica demanda veciñal do núcleo de Seixalbo e hoxe ratifícase un compromiso cercano ao millón de euros”, dixo o alcalde de Ourense, Jesús Vázquez.
O proxecto, hoxe publicado no Diario Oficial de Galicia, é froito dunha petición dos veciños de Seixalbo, petición que foi trasladada ao Goberno Municipal e éstes o pediron á Xunta de Galicia, administración titular desta estrada
Trátase, porén, dun proxecto dialogado e acordado co Concello e cos colectivos veciñais, que consistirá nunha actuación completa nun treito de 1,5 quilómetros, entre a zona do tanatorio e onde finalizan as vivendas, baseada na mellora da mobilidade peonil da zona, na reordenación do tráfico e no reforzo do firme.
Para mellorar a accesibilidade a Seixalbo levarase a cabo unha actuación na intersección existente coa rúa Igrexa e construirase unha glorieta no camiño de Zaín, que tamén dá acceso ao citado núcleo. Ademais habilitaranse carrís centrais de espera para permitir os xiros cara a esquerda con máis seguridade, e dotarase a zona de aparcadoiros en liña.
En canto ao fomento da mobilidade peonil, disporanse 3 pasos de peóns, dotándoos cos correspondentes semáforos con pulsador e de iluminación específica. As paradas de autobús existentes adecuaranse e recolocaranse despois dos pasos de peóns, de modo que ao baixar do bus este non reste visibilidade sobre o paso, tal e como ocorre agora.
Este proxecto tamén contempla a execución de novos treitos de beirarrúas e a reparación das existentes, adaptándoas tamén á normativa de accesibilidade. Ademais, construirase unha senda ciclista sentido subida ao longo de todo o treito.
