O cantante David Bustamante e os cómicos e presentadores de televisión Arturo Valls, Florentino Fernández e Dani Martínez, están entre os ciclistas (uns 300 segundo o Concello) que participan na Gaes Pilgrim Race, unha proba deportiva en bicicleta de montaña que chega este venres 21 de xullo pola tarde a Vilamartín de Valdeorras.
Esta actividade partía o domingo 16 de xullo, dende Madrid e durante esta semana, os participantes percorreron unha gran parte dos 725 quilómetros totais dos que consta, por rutas marcadas seguindo camiños de peregrinación que repartiron en 8 etapas. A sexta, que realizarán o venres, percorrerá parte do Camiño Francés e entrará en Galicia por Valdeorras a través do Camiño de Inverno. O trazado partirá de Astorga e parará en Vilamartín. Os deportistas farán noite na área recreativa do Bañadoiro e dende alí sairá ao día seguinte, 22 xullo, a sétima etapa para chegar a Lalín.
A concelleira de Deportes de Vilamartín de Valdeorras, Eva Arias, participa nesta iniciativa que promove as rutas xacobeas menos coñecidas, ademais de “organizar todos os preparativos para que o resto de participantes se sintan cómodos nas instalacións do Bañadoiro”, explican dende o Concello que cede o campo de fútbol para a acampada e o pavillón de deportes para instalar todos os servizos da organización, entre eles, “un sistema de cociñas para preparar as comidas”, puntualizan. Entre as actividades previstas para agasallar aos participantes desta proba haberá unha actuación do Folión Os viticultores, ademais dunha queimada con conxuro.
