As sete adegas participantes nas VII Xornadas de Portas Abertas da Ruta do Viño de Valdeorras ofrecían degustacións na tarde do 2 de xuño na festa que se organizaba na praza do Concello do Barco. Así, os visitantes podían catar os viños de Godeval, O Casal, O Cepado, Alán de Val, Joaquín Rebolledo, Roandi e A Coroa, acompañados de pinchos e mentres soaba a música de The Cruze. Este evento reunía a unhas 500 persoas, segundo a organización.
Esta “Festa de Portas Abertas” era unha das propostas incluídas no programa destas xornadas, celebradas do 1 ao 3 de xuño, nas que tamén se realizaban degustacións e catas dirixidas pola sumiller Mercedes González no Hotel Retaurante A Calzada (Arcos) e no Bravo Lux (A Rúa), visitas ás adegas da Denominación de Orixe Valdeorras e unha andaina polo Parque Natural da Serra da Enciña da Lastra (Rubiá), coa asistencia de 25 persoas.
Fotos: Carlos G. Hervella.