A través dunha concentración celebrada na mañá do 24 de xullo xunto ao Centro Saúde de Castro Caldelas, veciños e alcaldes das comarcas de Caldelas e Terras de Trives reividicaban que a atención pediátrica “é un servizo esencial básico para as nosas crianzas”.
Neste acto pedíase que “se repoña o servizo de pediatría neste centro e no centro de saúde de Trives que atenden entre os dous aos concellos da Comarca de Caldelas (Castro Caldelas, Montederramo, A Teixeira, Chandrexa de Queixa e Parada do Sil) e da Comarca de Trives (A Pobra de Trives, Manzaneda e San Xoan de Río)”.
Na concentración contábase coa presenza dos alcaldes e alcaldesas dos concellos afectados que amosaban o seu apoio e a súa colaboración “para emprender as medidas necesarias para que o servizo de pediatria volva a funcionar con normalidade” nos citados centros de saúde.
Na posterior reunión mantida polos rexedores dos oito concellos acordouse como primeira medida unha reunión a través da delegada da Xunta en Ourense co conselleiro de Benestar, Vicepresidente ou presidente da Xunta de Galicia “para acadar unha solución e manter o funcionamento ordinario deste servizo. Se as reivindicacións non se garantizan comezarnse as accións de presión necesarias para o seu mantemento co apoio dos afectados pola supresión da asistencia pediátrica. A reunión debe ser acordada de xeito inmediato para garantir a continuidade deste servizo básico para as crianzas e así fixar poboación e poder seguir traballando a prol do desenvolvemento do rural nestas comarcas”, segundo se informa dende o Concello de Castro Caldelas.
Fotos cedidas.