Cunca en man, pano de cor verde ao pescozo e coas camisetas máis divertidas, a xente foise achegando a XVIII edición da Festa das Covas de Vilamartín. Era tempo de divertirse, e a pequena localidade valdeorresa agardaba aos visitantes chea de luces, bo ambiente e máis de corenta covas coas súas portas abertas.
A celebración está marcada en vermello no calendario da mocidade da comarca, pero tamén é unha data sinalada para moitas persoas doutras comunidades amantes dos viños e a comida de Galiza. É o caso de Adelaida, natural de Barcelona, que asegura vir a “unha festa xenial chea de xente encantadora”. Castela e León, unha das comunidades veciñas tamén tivo gran representación neste evento. “É unha festa espectacular!”, aseguraba a salmantina Natalia. O vallisoletano Roberto tamén quedou abraiado da beleza da terras galegas e “espera repetir o próximo ano”.
Chegadas as doce da noite, e a ritmo de tambor, a xente desprazouse á Rodeleira para seguir empapándose do ambiente amigable e festivo do pobo grazas á Orquestra Fénix.
María Jesusa Candal, alcaldesa de Vilamartín, asegurou que “as covas atraen a máis de 5000 persoas cada ano, axudando a potenciar o turismo e a hostalaría” e anima a todo o mundo a que disfrute do “bo viño de Valdeorras”. Así mesmo, Antonio Aguarón, jefe da Área de Turismo en Ourense, cre imprescindibles estas festas para “manter as tradicións populares galegas” e recalca que “Galicia ten moito que mostrar”.
Dende a organización, Tito, tesoureiro da Asociación Cultural de Coveiros de Vilamartín, mostrouse satisfeito polo transcurso da festa e afluencia de xente que, cada ano, inclúe a máis persoas de todos os puntos da xeografía española. Nesta edición foron 4.200.
Texto: Miguel Gómez Longo
