As continuas e intensas borrascas que afectaron a Ourense no mes decembro de 2019 facían medrar de maneira considerable os caudais dos ríos na provincia, deixando imaxes impresionantes das riadas e dos encoros desaugando, ademais de cifras realmente significativas como os 1.200 m3/s do Sil no Barco de Valdeorras, onde chegou a subir por riba dos 10 m; ou os 3.490 m3/s do Miño en Ourense. Trátase dos segundos valores máis altos dende o ano 2000, segundo confirma a Confederación Hidrográfica Miño-Sil. Esta subida dos cauces provocou desbordamentos en certos puntos, entre outros incidentes, e deixaba os encoros da provincia ao 90% da súa capacidade.
Sobre as enchentes dos ríos, e en especial do Sil e do Miño, incluíndo datos da reserva hidráulica desta conca desglosados por encoros e tamén da reserva nacional, afonda o tema de En Portada co que o Periódico O Sil enceta o número de xaneiro e tamén o 2020. Un número de 40 páxinas no que se tratan outros temas, incluíndo ademais un percorrido polas principais festas gastronómicas e patronais do mes de xaneiro.
