CulturaCulturaÚltima hora

As festas de San Roque (A Rúa) comezan mañá cunha sesión de cine ao aire libre

O programa, organizado pola Asociación Sabugueiro estenderase ata o día 20 con actividades variadas para todos os públicos
Baile no campo de San Roque nas festas do ano pasado./ Foto: Mónica G. Bellver.

Coa recuperación da Asociación Sabugueiro A Rúa Vella vivirá este ano unhas festas de San Roque moi especiais coa recuperación do cine ao aire libre. De feito, a proxección de Coco na praza do Forno (O Barrio) mañá día 14 ás 22:30h., marcará o inicio dun programa que continuará ao día seguinte con teatro da man de A Ruada, ás 22:30h.

Con todo, será o venres día 16 cando comecen as festas propiamente ditas, co traslado do santo dende a capela no campo de San Roque ata a Igrexa de Santo Estevo, previsto para as 21h. E xa pola noite teremos a primeira cita musical da festa, coa actuación do grupo de versións Los Íñigos a partir das 23h. e da nova Danzalia Disco-Show a continuación. O sábado 17 de agosto, a xornada arrancará cun pasarrúas pola mañá a cargo do grupo de gaitas Airiños da Portela. Pola tarde, en torno ás catro comezará o campionato de tute por parellas na praza César Conti, e dese mesmo punto sairá ás sete da tarde, a XXXIX edición da Volta Ecolóxica, unha divertida e peculiar ruta en bicicleta con disfraces reivindicativos que remata no campo de San Roque. Ese día, o ritmo poráo o grupo Samba que actuará en sesión de tarde e verbena.

 

A Volta Ecolóxica será o sábado a partir das sete da tarde./ Foto: Mónica G. Bellver.

E así chegamos ao domingo, 18 de agosto, día grande das festas anunciado polo pasarrúas da Agrupación Musical da Limia que tamén acompañará á procesión prevista para as 12:30h. que levará ao santo de regreso á capela. Unha vez no campo de San Roque, a banda de música amenizará a sesión vermú. Pola tarde, a música volverá correr por conta da banda que dará outro concerto, desta volta na praza César Conti (19h.). O broche á xornada poráo a actuación da orquestra Pontevedra que actuará en sesión de tarde e verbena.

O luns 19 de agosto será o Día dos Nenos coa xa tradicional festa da auga ás 18h. na praza César Conti. Ademais, pola mañá haberá pasarrúas da charanga Nova Terras de Trives que tamén amenizará a sesión vermú; misa campestre en San Roque (12:30h.); e pola tarde a actuación da orquestra Cinema que será a encargada de baixar o pano coa sesión de tarde e verbena. Con todo, a clausura das Festas de San Roque 2019 será o martes día 20 cos partidos de solteiras-casadas e solteiros-casados que comezarán ás 20:30h. Ao rematar haberá chocolate gratis para todos.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close