En portadaGalerías de fotosÚltima hora

As mascaradas de inverno toman Viana do Bolo

Esta vila acollía na tarde do 11 de xaneiro a primeira xornada do VI Festival Internacional ViBoMask, que continuará mañá en Vilariño de Conso

 

Máscaras de diferentes lugares de Galicia, así como doutros puntos da península e mesmo de Italia enchían de ritualidade, ritmos e danzas as rúas de Viana do Bolo. Unhas 40 festas de inverno participaban nesta vila no VI Festival Internacional ViBoMask Mascarada Ibérica a partir das 16:30h. deste sábado 11 de xaneiro.

Numerosas persoas seguían o percorrido deste longo desfile que se iniciaba no Toural e finalizaba na praza Maior, onde estaba instalada dende a mañá unha mostra de artesanía e de produtos gastronómicos da comarca.

 

Mázcara do Folión de Buxán (O Bolo)./ Foto: Ángeles Rodríguez.

 

O desfile abríao o intenso ritmo da Asociación Xuntos polo Fulión de Vilariño de Conso, acompañada polos saltos e as danzas dos seus Boteiros. A continuación podían verse diversos fulións vianeses (os Fulións Rurais, o das Carrelas, o Fulión Alternativo e o de Cabo da Vila), ademais dos fulións de Buxán (O Bolo), da Mourela p’acá (Manzaneda), do Touro e o Xigante de Celavente, o Entroido da Veiga (con máscaras como os Charrelos, o Boi e a Morte), as Madamitas de Entrimo, os Follateiros de Lobios, os Felos de Maceda, os Felos e as Madamas de Esgos, as Bonitas de Sande, os Galos de San Pedro da Mezquita (A Merca), as Pantallas de Xinzo de Limia, os Peliqueiros e Parranfóns de Campobecerros (Castrelo do Val) ou os Verrallóns de Riós.

 

Boteiros da Asociación Xuntos polo Fulión de Vilariño de Conso./ Foto: Carlos G. Hervella.

 

Participan ademais Entroidos doutras provincias galegas como o Entroido Ribeirao (Santiago de Arriba, Chantada), o Oso de Salcedo (A Pobra do Brollón), o Entroido de Samede (Paderne, A Coruña), os Merdeiros de Vigo, as Madamas e galáns de Cobres (Vilaboa, Pontevedra) e os Xenerais da Ulla (concellos da comarca da Ulla, A Coruña), pechando xa o desfile.

 

Vaca e Cervo de Campobecerros (Castrelo do Val)./ Foto: Ángeles Rodríguez.

 

Había así mesmo mascaradas de inverno como a Vijanera (Silió, Cantabria) e Entroidos doutras partes da península como o Antruejo de Carrizo de La Ribera (León), o Atenazador (San Vicente de la Cabeza, Zamora), as Mázcaras e Madamas de Pombriego (León), as Talanqueiras e Visparras de San Martín de Castañeda (Galende, Zamora), os Diablos e Mascaritas de Luzón (Guadalaxara), o Carnaval de Abanto (Biscaia) e os Caretos de Bragança e de Lazarim (Portugal).

 

Danzantes do Entroido de Samede (A Coruña), con algúns Mamuthones (Sardeña, Italia)./ Foto: Ángeles Rodríguez.

 

Nova cita o domingo 12 de xaneiro en Vilariño de Conso

Este festival internacional, o máis grande de mascaradas que se celebra na península, continuará mañá domingo 12 de xaneiro, desta volta na veciña vila de Vilariño de Conso. O desfile comezará a partir das 11:30h.

Fotos: Carlos G. Hervella.
Máis fotos:
https://www.osil.info/multitudinaria-mascarada-internacional-en-viana-do-bolo/
Vídeos:
https://www.osil.info/videos-do-vi-festival-internacional-vibomask-mascarada-iberica-en-viana-do-bolo/

Issohadores (Sardeña, Italia), lanzando a súa corda durante o desfile./ Foto: Ángeles Rodríguez.

 

Xenerais da Ulla (A Coruña)./Foto: Ángeles Rodríguez.

 

Outra imaxe dos Xenerais da Ulla, que pechaban o desfile./ Foto: Carlos G. Hervella.

Artigos relacionados

Back to top button
Close