Cumprindo coa tradición, o vindeiro mes de decembro o Club de Montañismo Montañas de Trevinca (A Veiga) organizará unha ascensión para colocar no cume desta montaña (2.127 m) o “Belén da cima de Galicia”. A actividade será dirixida por Antonio Fdez Pena (Cholo), técnico deportivo en montañismo, alpinismo e rocha; e por Juanjo Lorenzo, técnico deportivo N2 media montaña.
A marcha está fixada para o vindeiro sábado 1 de decembro e partirá ás nove da mañá dende a localidade de Vilanova (A Veiga). Ás 13h. está previsto que se acade o cumio da montaña e que se instale o nacemento. O percorrido ten unha lonxitude duns 24,50 qm, cun desnivel acumulado de algo máis de 2.900 m e que se completará nunhas 9 h. O nivel de esixencia é alto.
Xa ás 13:30h. comezará a viaxe de volta, facendo un descenso polo Sestil Alto. A chegada ao punto de saída, é dicir Vilanova, está programada para ás 17:30h. e, despois, os participantes poderán compartir experiencias e repoñer forzas cunha merenda.
As persoas interesadas en sumarse a esta ascensión poderán ampliar información e anotarse ata o 29 de novembro ás 17h. en club@montanasdetrevinca.es, tendo en conta que as prazas son limitadas. Dende a organización infórmase de que “todos os participantes nesta actividade terán que estar en posesión da licenza federativa de montañismo do ano 2018 ou, no seu defecto, ter solicitado o seguro individual de accidentes para esta actividade, previo pago de 6 euros para os socios”.