En portadaGalerías de fotosÚltima hora

Atopan posibles restos humanos prehistóricos na Ribeira Sacra

Na escavación dos Conventos en Vilachá (Pobra de Brollón) descubríase: un cranio, unha vértebra e dous fémures que, pola súa colocación e contexto arqueolóxico, semellan estar soterrados nunha cista prehistórica

Un equipo de arqueólogos buscaba un primitivo mosteiro medieval, o de San Martiño de Piñeira, na escavación dos Conventos no Val do Frade, Vilachá (A Pobra do Brollón), pero ao final da escavación topaban con algo moi diferente: restos humanos posiblemente prehistóricos, tal e como veñen de facer público. “De confirmarse con Carbono 14 a datación dos ósos atopados, estarían entre os restos humanos máis antigos atopados en Galicia”, segundo se informa dende o equipo, dirixido polo arqueólogo Xurxo Ayán e coa participación do Incipit-CSIC.

En concreto descubrían: un cranio, unha vértebra e dous fémures que, pola súa colocación e contexto arqueolóxico, semellan estar soterrados nunha cista prehistórica. “O achado é de gran importancia pola case nula existencia de restos óseos humanos prehistóricos en Galicia. Os restos xa están camiño ao laboratorio BETA para a súa datación con Carbono 14. Ademais do C14 aplicaranse outro tipo de probas que poderán dar información sobre a dieta ou incluso ADN”, segundo os investigadores.

A escavación en Os Conventos enmárcase na iniciativa Adegas da Memoria, un proxecto etnoarqueolóxico que busca dinamizar a parroquia de Vilachá de Salvadur, promovido pola Asociación veciñal de Vilachá e o Concello da Pobra do Brollón, coa colaboración do Incipit-CSIC.

Durante a escavación do Convestos púidose constatar unha ocupación medieval do lugar con mostras de cerámica dos séculos XII ou XIII e unha moeda do reinado de Alfonso X. Por debaixo deses niveis medievais, escavado directamente na rocha apareceu o oco cos restos humanos; un depósito funerario que indica un tratamento ritual posterior do cadáver.

“Con este novo achado, superamos con creces o obxectivo principal de Adegas da Memoria, que é facer o primeiro gran estudo sobre as orixes e evolución da paisaxe da Ribeira Sacra por man das persoas”, declara o investigador da Universidade Nova de Lisboa e director da intervención, Xurxo Ayán.

O técnico de cultura do Concello da Pobra e coordinador do proxecto Xosé Gago, comenta a importancia deste achado nun contexto no que a Ribeira Sacra é candidata a Patrimonio da Humanidade: “a paisaxe da Ribeira Sacra é unha paisaxe cultural que non se pode entender nin concibir sen ter en conta ás persoas que viviron e traballaron, que viven e traballan, na zona.”

Fotos cedidas.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close