Neste domingo 10 de maio o Hospital Público de Valdeorras rexistra tres pacientes con coronavirus ingresados en planta, segundo a última actualización de datos da Consellería de Sanidade. Son tres ingresos menos que onte e a cifra máis baixa en semanas no centro hospitalario barquense.
O Hospital de Verín ten un paciente ingresado en planta, mentres que no Hospital Universitario de Ourense hai 59 en planta e 3 en UCI (éstes últimos de prognóstico grave).
Dos 407 casos activos hoxe na Área Sanitaria de Ourense, Verín e O Barco de Valdeorras,
341 permanecen a seguemento a domicilio, 63 ingresados en planta e 3 en UCI, segundo a Consellería de Sanidade.
O total de casos rexistrados na provincia ascende a 1.909, con 1.379 curados e 123 falecementos (residencias e hospitais). Ademais lévanse realizado 17.265 probas PCR.
Os datos do coronavirus en Galicia
O total de casos activos de coronavirus en Galicia ascende a 2.703, deles 635 son da área da Coruña, 161 da de Lugo, 407 da de Ourense, 142 da de Pontevedra, 725 da área de Vigo, 525 da de Santiago, e 108 da de Ferrol, segundo a Consellería de Sanidade.
Do conxunto de pacientes positivos, 25 permanecen en UCI, 180 están en unidades de hospitalización e 2.498 no domicilio. Polo de agora, en Galicia hai un total de 7.347 persoas curadas e rexistrándose 592 falecementos. O número de PCR realizadas é de 114.836.
