Leve descenso nas cifras de casos activos de coronavirus na provincia de Ourense, que aínda así continúa por riba dos 500. Así nesta xornada na Área Sanitaria de Ourense, Verín e O Barco rexístranse 506 pacientes con infección activa, 13 menos que onte, segundo os últimos datos da Consellería de Sanidade (actualizados ás 18h. do 22 de decembro). Dese total, 24 están hospitalizados en planta (6 menos que onte) e 4 na Unidade de Coidados Intensivos (os mesmos que onte). Baixan así mesmo os novos casos confirmados por PCR nas últimas 24 horas cun total de 22 (fronte aos 44 de onte).
No que se refire aos ingresos, o Hospital Público de Valdeorras baixa a 5 persoas hospitalizadas en planta (1 menos que onte), mentres o Hospital de Verín continúa con 3 en planta (os mesmos que onte), e o Hospital Universitario de Ourense rexistra 16 en planta (5 menos que onte) e 4 na Unidade de Coidados Intensivos (os mesmos que onte).
O total de casos rexistrados ata o de agora na provincia ascende a 8.232, con 7.418 curados e 307 falecidos (Sanidade non comunicaba onte ningún falecemento). Polo de agora lévanse realizado 131.359 probas PCR e 66.797 probas serolóxicas.
