Superar as 5.000 doazóns este verán. Ese é o reto que se marca o Concello de Barbadás para axudar aos enfermos ingresados nos hospitais. Para iso pon en marcha unha campaña de concienciación que busca mobilizar e incrementar os 755 doadores censados no municipio premiando a súa solidariedade cun xeado.
Segundo os datos aportados pola administración local, o municipio leva rexistradas 4.941 doazóns de sangue dende a primeira visita da unidade móbil, en 1995. Agora o obxectivo é superar esa cifra durante os meses do estío.
A unidade móbil estará na Valenzá o vindeiro xoves 11 diante da farmacia situada á altura do número 72 da avenida de Celanova. Os interesados poderán acudir en horario de 9:30 a 14:30 e de 15:30 a 21 horas.
Nesta campaña colabora o Centro de Transfusión de Galicia e as concellerías de Sanidade e Comercio de Barbadás.
