A memoria de Jesús Carrera (o xove deportista falecido hai oito meses) está máis viva que nunca. Así se demostrou, unha vez máis, no partido celebrado na tarde do 9 de setembro no pavillón de Calabagueiros, onde pasadas as sete e media da tarde comezaba o I Memorial Jess Carrera, cos equipos do Pizarras Tres Cuñados FS e Santiago Futsal sobre o parqué.
En honra ao obxectivo final do encontro que non era outro que lembrar a Jesús, antes de que o colexiado pitase o comezo do partido, o capitán do Santiago Futsal (equipo de división de honra) entregaba ao capitán valdeorrés, Bruno (irmán do falecido), a camiseta do seu equipo co nº 3, o mesmo co que xogaba Jesús. No apartado deportivo, os santiagueses acabarían dominando o encontro e malia que os de Xocas pelexaron con uñas e dentes o final chegaba co 1-4 no luminoso. O único tanto local foi de Bruno.
Sen dúbida foi un partido de luxo o que puderon ver os numerosos asistentes que enchían as bancadas. Entre eles estaban varios representantes da Federación Galega de Fútbol co presidente, Rafael Louzán á cabeza, quenes no descanso do partido, rendían a súa particular homenaxe a Jesús. Acompañados polo alcalde do Barco de Valdeorras, Alfredo García e polo concelleiro de Deportes, Aurentino Alonso, Louzán entregáballe á familia un ramo de flores, unha camiseta da federación galega e un talón por importe de 12.000 euros “como a indemnización que corresponde nun caso como este xa que o falecemento tiña lugar de viaxe á celebración dun partido”, explicou o propio presidente da federación puntualizando que “ningunha vida ten prezo”.
Fotos: Carlos G. Hervella/ Mónica G. Bellver.
