EntrevistasÚltima hora

Beatriz Gómez: “Temos un comercio que é un referente na cidade”

A nova presidenta da Federación de Comercio de Ourense promete traballar por un sector que comeza a rexistrar “un pequeno repunte positivo”
Beatriz Gómez Valcárcel, onte, en Ourense. // Foto: Carlos G. Hervella
Beatriz Gómez Valcárcel, onte, en Ourense. // Foto: Carlos G. Hervella

Beatriz Gómez Valcárcel alzábase na tarde de onte como a nova presidenta da Federación de Comercio de Ourense, converténdose tamén na primeira muller en facelo. A tamén presidenta da Asociación de Perruqueiros de Ourense mostrouse orgullosa ante a nova encomenda e prometeu seguir traballando para dar continuidade ao legado da anterior xunta directiva sen esquecer o planeamento de novos retos. En declaracións ao Periódico O SIL, Gómez cre que a pantasma da crise aínda segue presente pero recoñece “brotes verdes” no sector, un sector que define como “referente na cidade a nivel turístico, en ingresos e en número de empregados”. Agora afronta unha nova etapa que completará proximamente co abandono do cargo á fronte dos perruqueiros, un posto que, segundo avanza, ten a continuidade asegurada.

Noraboa polo novo cargo. Primeira presidenta muller, que expectativas ten?
Espero conseguir obxectivos e proxectos comúns que teño co meu equipo, potenciar campañas moi importantes que ten o comercio e facelo na rúa. A cercanía co comerciante e co cliente final para min é moi importante. Tamén loitarei co calendario das rebaixas, cos horarios de apertura e peche e eses problemas que afectan ao comercio dende fai tempo.

Anteriormente xa desempeñaba outros postos na directiva da federación e coñece ben o comercio local, como está a situación?
Non se pode dicir que xa pasou a crise, porque segue a estar aí, pero si que se nota que hai un pequeno repunte positivo. De feito nótase nas rúas, que xa levamos uns meses con moitísima afluencia. O importante é que a xente saia á rúa porque unha vez que sae, consume.

A estratexia da nova directiva buscará consolidar brotes verdes? De que xeito?
Si, consolidaremos eses brotes verdes e imos seguir un pouco na liña da anterior xunta directiva. Hai actividades e proxectos xa programados e que se van facer este ano, que foron un éxito, pero cara o ano xa se irán introducindo novos proxectos.

Que campañas destacaría?
‘Merca na túa vila’ e ‘Merca relaxándote’. Foron un éxito porque foi o cliente final o que obtivo os premios e todo o que se fai na rúa ten unha repercusión moi grande.

Como ve o feito de ser a primeira muller á fronte do colectivo?
Síntome moi orgullosa, porque temos un papel fundamental no comercio. E temos un comercio que é unha referencia na cidade a nivel turístico, en ingresos e en número de empregados.

Texto: Sara Fontenla

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close