O vindeiro domingo 26 de outubro, o Teatro Principal de Ourense acollerá o único concerto de Bex Marshal Band en Galicia (previamente actuará en León e Valladolid), e faráo para clausurar a XI edición do Festival de Blues Teatro Principal. A cita será a partires das 20h. e ao longo da actuación, a cantante, guitarrista e compositora inglesa Bex Marshal, fará gala da súa arte sobre o escenario.
Coa guitarra ás costas (esa Gibson Hummingbird electroacústica modelo 1963 que lle regalou un tío seu, músico profesional), e influenciada polas grandes bandas de rock británicas dos anos 70, o folk e o blues tradicional, así como o country-rock americano, Marshal foi forxando o seu propio estilo. Tras varios anos no panorama musical, o seu terceiro álbume “The House Of Mercy” levouna a consolidarse en EE.UU, Canadá, Sudamérica, Australia e boa parte de Europa, incluída España onde chega por primeira vez coa súa banda.
