Despois de tres meses sen liga, os afeccionados teñen ganas de fútbol. Así o demostraron os numerosos asistentes, de ambos equipos, ao primeiro partido de liga en terceira división no campo de Espiñedo, no Caraballiño. Alí, na tarde do 25 de agosto comezaba a liga 2019/2020 igual que terminara a 2018/2019, co C.D. Arenteiro e o C.D. Barco sobre o céspede.
No último encontro da pasada campaña, Adrián marcaba o único tanto que daba a vitoria ao conxunto barquense e tres meses despois, cos cambios no plantel de ámbolos dous equipos, o empate selaba o final do primeiro encontro desta tempada. O capitán dos visitantes, Rubén García abría o marcador no minuto 17 ao transformar un penalti, chegando ao descanso co 0-1. A segunda metade era para os locais, co gol de Ivalotelli no minuto 57.
Táboas nun partido marcado polo apoio da afección. A carballinesa respondeu en masa a este primeiro choque da tempada pero a barquense non quedou atrás cunha boa representación nas bancadas (parte dos UltrSil e tamén da directiva co presidente, Nilo Ramos á fronte).
A seguinte cita para os vermellos do Barco será o 1 de setembro en casa, no campo de Calabagueiros, contra o Alondras. Os verdibracos do Carballiño mediranse a domicilio co Bergantiños.
Fotos: Carlos G. Hervella.
