O obradoiro dual Montañas do Courel, á inciativa dos concellos de Quiroga, Ribas de Sil e Folgoso do Courel; vén de inaugurarse esta mañá. Formará a 20 alumnos na especialidade de Operacións de formigón e conta cun orzamento de 346.946 euros. Terá unha duración de nove meses, durante os cales os participantes aprenderán traballando ao tempo que realizan obras en espazos públicos dos concellos promotores.
Así, en Quiroga traballarán na ampliación do Museo Etnográfico; en Ribas de Sil construirán un cobertizo e mellorarán os accesos á praia fluvial e á zona recreativa de San Clodio, e en Folgoso do Courel acondicionarán un miradoiro no alto do Boi, unha área de estacionamento de caravanas e una alvariza, entre outras tarefas.
Os tres concellos comparten tamén un obradoiro de garantía xuvenil, financiado pola Xunta con 369.500 euros. Comezou en novembro e imparte formación en actividades auxiliares en conservación e mellora de montes. As actividades forestais reciben un tratamento prioritario no programa de obradoiros por tratase dun sector en auxe con boas perspectivas de empregabilidade.
Por último, hai uns días rematou o obradoiro Sillor VI, outra experiencia compartida que contou cun orzamento de 460.365 euros. Este proxecto desenvolveuse durante o último ano, superando en máis dun terzo o orzamento e a duración inicialmente previstas para compensar o período en que a actividade estivo suspendida por mor da pandemia.
A Xunta de Galicia inviste 1.176.800 euros nos tres obradoiros de emprego compartidos por Folgoso do Courel, Ribas de Sil e Quiroga no último ano, que en conxunto ofrecen formación e emprego remunerado a 56 traballadores desempregados.
Un dos atractivos da iniciativa dos tres concellos da comarca de Quiroga unidos por proxectos comúns é que permite optimizar os recursos públicos. De feito, a Xunta apoia este tipo de solicitudes que favorecen aos municipios rurais, nos que resulta máis necesario xerar oportunidades de emprego que axuden a fixar poboación.
