A Consellería de Sanidade vén de confirmar un novo brote de coronavirus en Ourense. “Ata o momento son 9 os casos positivos detectados no barrio de A Cuña-Mariñamansa con orixe social. Deles, dous homes de 62 e 81 anos, están ingresados no Hospital Universitario de Ourense e o resto, cinco homes e dúas mulleres, de idades comprendidas entre os 27 e os 66 anos, xa illados e a seguemento domiciliario polo persoal do Sergas”, tal e como informa a Consellería de Sanidade.
Dacordo co protocolo, e á espera dos resultados das probas que se están a realizar á rede dos contactos estreitos xa identificados, “a todos eles indicouselle corentena de catorce días, para monitorizar a súa evolución, indistintamente dos resultados das PCR, como ven sendo habitual como medida de prevención”, indica o Sergas.
Con este mesmo criterio de prudencia, e tendo en conta que o seguemento de contactos continúa activo, desde a Xerencia da Área Sanitaria déronse instrucións ás residencias sociosanitarias localizadas neste barrio para limitar os accesos ou visitas e a saída dos residentes.
