Camiñando entre mitos polas terras de San Xoán de Río

O vindeiro 19 de abril terá lugar unha andaina circular, promovida por RíoMola e pola SAGA, que percorrerá a xeografía lendaria deste municipio

Miliarios romanos no alto de Cerdeira (San Xoán de Río)./ Foto: Carlos G. Hervella.

Lugares marcados pola historia, pero tamén envoltos na lenda no municipio de San Xoán de Río. Para descubrilos a Asociación Cultural RíoMola propón nesta Semana Santa unha ruta guiada en colaboracón coa  SAGA (Sociedade Antropolóxica Galega). Trátase da “Andaina Camiñando entre mitos”, prevista para o vindeiro 19 de abril. Terá un percorrido duns 8,5 km (cun tempo estimado de 4 horas) e un traxecto circular de dificultade media con saída e meta en Cerdeira. O guía da ruta será Miguel Losada.

Punto de encontro para os participantes será a Casa do Comediante en Cerdeira ás 9:30 da mañá. “Esta xeira percorre unha parte do Concello de San Xoán de Río, Ourense. As poboacións de Cerdeira, Reboledo, Domecelle e Móuruás, serán coma illas dentro dun periplo por un mar de rebolos, carballos e castiñeiros. Mergullados nel, aboiaremos de cando en vez para observar como moitas veces a Historia é a mais grande das ficcións, como dixo o escritor arxentino Jorge Luís Borges. Noutras tantas ocasións, será iso que consideramos lenda ou ficción o que apareza como unha realidade tanxible diante mesmo de nos”, segundo explican dende a organización.

 

 

Trátase dunha viaxe no espazo “mais tamén no tempo, xa que un dos obxectivos desta actividade será precisamente o de tender unha ponte, ou abrir unha xanela, cara un pasado no que heroes, mitos e deuses antigos formaban parte dunha realidade aumentada e tradicional. Daquela, toda esta paisaxe formaba parte dun inmenso contexto cheo de fabulosos contidos materiais e historias extraordinarias”, engaden os promotores da iniciativa.

A andaina é gratuíta e as persoas interesadas só teñen que presentarse no punto de encontro nese día. Non é preciso inscrición previa.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies