A Delegación Territorial da Xunta de Galicia desenvolveu unha campaña de recollida de alimentos en todas as sedes das Xefaturas Territoriais de Ourense co obxectivo de colaborar coas familias máis necesitadas e encher as súas despensas polo Nadal. Esta iniciativa comezou o pasado día 3 e prolongouse ata hoxe, 20 de decembro.
A delegada territorial da Xunta en Ourense, Marisol Díaz Mouteira, acompañada de xefes territoriais de varias consellerías achegáronse este mediodía ata o almacén que o Banco de Alimentos ten na cidade para facerlle entrega ao presidente do Banco de Alimentos de Ourense, Cecilio Santalices, dos alimentos non perecedeiros recollidos durante a campaña. Aceite, legumes, pastas, leite, e doces típicos do Nadal son algúns dos alimentos que os empregados públicos doaron para esta campaña.
Esta iniciativa sumouse á que leva organizando desde 2016 o Servizo de Emerxencias, da Xefatura Territorial da Consellería de Presidencia, Administracións Públicas e Xustiza, en coordinación coas agrupacións de voluntarios de Protección Civil (AVPC) da provincia. Varios representantes destas agrupacións ourensáns, entre os que había algúns de Manzaneda, O Bolo e A Gudiña; acudían tamén a este acto e entrega de alimentos.