Na mañá do 5 de setembro a número un na lista do BNG por Ourense nas eleccións galegas, Noa Presas, viaxaba ata A Mezquita e mantiña un encontro cunha ducia de apicultores, no que tamén estaban presentes o número dous da candidatura ourensá, Suso Vilasánchez, e o alcalde da localidade, Rafael Pérez.
No decurso da xuntanza os apicultores manifestaban a súa situación de indefensión ante a práctica “de empresas de fóra de Galiza que, despois de facer tres colleitas no sur do Estado, transportan as súas colmeas ata fincas particulares da Mezquita, A Gudiña, Riós ou Viana, entre outros concellos, para a colleita da flor do carballo. Na maioría dos casos non solicitan os permisos pertinentes á Administración autonómica e local. E, cando se tramitan as sancións, chegan tarde ou son insuficientes como medida disuasoria para evitar que produtores de fóra diminúan a produción local.”, segundo se informa dende o BNG.
Ante isto, Noa Presas indicaba que o BNG impulsará os cambios precisos na lexislación en vigor “para que a norma se aplique con axilidade e coa urxencia necesaria para que se fagan efectivas as sancións”, recollendo as demandas dos apicultores. Asemade sinalaba que para campañas como a actual, onde a produción foi baixa, o BNG proporá unha “reserva nos orzamentos” para axudas en situacións coma esta.
E anunciaba que o BNG proxecta impulsar a creación “dunha marca xeral para os produtos agrarios galegos, que acabe coa competencia desleal e cos enganos de produtos feitos noutros territorios do Estado e vendidos falsamente como galegos”.