Cita co Entroido na xornada deste mércores 8 de setembro no Auditorio de Verín no marco do VI Festival Internacional de Curtas (FIC) Vía XIV. Esta tarde estreábase “Capuchóns”, unha curta documental sobre o Entroido de Verín, dirixida por Íñigo Rolán Taboada como proxecto de fin de grao.
Este verinés ten colaborado en diferentes edicións do FIC Vía XIV de Verín, o que “evidencia que a canteira do certame comeza a dar os seus froitos”, resaltan dende a organización da mostra.
“Capuchóns” é unha peza, de 13 minutos, na que se recupera a través de imaxes de arquivo inéditas e testemuñas dos protagonistas do carnaval a esencia desta festa durante os anos 70, 80 e 90. A curta aborda unha época na que as celebracións mantiñan un carácter enxebre, na que a fariña estaba presente todos os días e na que as carrozas non lucían só o Domingo de Entroido. Un manifesto a prol da volta a unhas tradicións que se perderon desde hai moito anos debido á visión máis turística que colleu o Carnaval de Verín.
Tras a proxección, tiña lugar un interesante coloquio.
Tempo Documentary Festival
Xunto a isto, hoxe puido verse en Verín unha selección de curtas do Tempo Documentary Festival de Suecia, un foro cinematográfico que este ano é o festival convidado polo FIC Vía XIV. O certame escandinavo acadou neste 2021 a súa XXII edición e erixiuse, ao longo de todo este tempo, coma un foro único para a presentación de traballos documentais internacionais.
A selección de curtas deste festival sueco que puido verse en Verín incluíu os títulos “A mother´s body”; “Between these folded walls”, “Utopia”; “Lihkku!”; “Obituary” e “Voices of our time”. Simón Revilla, director dunha destas curtas (“Obituary”) achegouse ata Verín para compartir co público aspectos da rodaxe da curta.