Bota a andar no Carballiño o programa integral “Carbaemprega”, unha iniciativa posta en marcha polo Concello, coa colaboración e apoio da Xunta, que busca fomentar a inserción laboral de 60 persoas. Durante un ano, os alumnos recibirán formación para que melloren o seu acceso a un traballo. O obxectivo é acadar unha inserción de preto do 50%.
O plan era presentado na mañá do 28 de outubro na vila carballiñesa. No acto participou o alcalde, Francisco Fumega, o director xeral de Orientación e Promoción Laboral, Alfonso Marnotes, o edil de Promoción Económica, Adolfo Nogueira, os concelleiros Argimiro Marnotes e Marcos Reboredo e os presidentes dos empresarios do Polígono e do Centro Comercial Aberto. Tamén asistiu o director do grupo empresarial do sector eólico GRI, ademais de formadores, orientadores laborais e os propios alumnos.
Actualmente, O Carballiño ten en marcha na comarca cinco programas de formación laboral no que participan 75 persoas, incluíndo os obradoiros de emprego.
